की हम्मर मोछ निहार ह?

यह कविता मगही की सबसे लोकप्रिय कविताआें में से एक है। १९६७ से अभी तक एक हजार से अधिक मंचों पर यह कविता पढ़ी जा चुकी है पर इसकी मांग आज भी उतनी ही है। आम लोगों में आशुकवि डा. योगेश्वर प्रसाद सिंह योगेश की पहचान मगही के प्रथम महाकाव्य ..गौतम.. की रचना के लिए उतनी नहीं है जितनी इस कविता के लिए है।

की हम्मर मोछ निहार ह?
मोछ पर सान हल भारत के
हल मोछ सहारा आरत के
जहिना से मोछ कटा गेलो
ई लच्छन भेलो गारत के
जब मोछ हलो तब जय भेलो
अब मोछ कटल तब हार ह।।की हम्मर..

ई मोछ मरद केचिन्हा हे
दुस्मन खातिर छरबिन्हा हे
मोछे कटवा के राजपूत
अब सिंह से बनलन सिन्हा हे
जब मोछे नय तब झूठ मूठ
की उलटे सान बघार ह।। की हम्मर..

पमही से रेख उठानी हे
मोछे से सरस जुआनी हे
बिनु मोछ निपनिया कहलइब
मोछेसे मुंह के पानी हे
तूं मोछ कटा मेहरी बनल
अब बैठल मच्छी मार ह।। की हम्मर...

हल मोछ भीम अउ अरजुन के
कांपल दुस्मन बोली सुन के
पृथ्वीराज के मोछ देख
भागल गोरी अंखिया मुन के
हे सगरो झगड़ा मोछे के
तूं बिना मोछ ललकार ह।। की हम्मर..

ऊ वीर शिवाजी, राना के
ऊ वीर कुंवर मरदाना के
मोछे से दुस्मन मात भेल
तात्या टोपे अउ नाना के
तूं मोछ कटा फिल्मी दुनियां
में जाके दांत चियाड़ ह।। की हम्मर..

हल वीर भगत के मोछे पर
आजादी के मतवालापन
वीरे रस के कविता कइलन
मोछेवाला ऊ कवि भूषण
तूं मोछ कटा के मउगी भिर
चुपके से लत्ती झार ह।। की हम्मर...

मोछे तो भेद बताव हे
ई मरद अउर मेहरारू के
बाहर के धूरी गरदा ल
ई काम कर% हे झारू के
फरसाकट की फ्रेंचकट के भी
तू नय भार सम्हार ह।। की हम्मर...

(रचना काल : २५ दिसंबर १९६७)

मगही बोलनेवालों के लिए कुछ खास

मगही के महाकवि योगेश जी के लोक्प्रिये कविता ...की हम्मर मोछ निहार ह?... कल येही ब्लॉग पर देखल जा सक हे। इ कविता मगही भासा के सबसे लोकप्रिय मंचीय कविता मानल जा हे। एकरा ला इंतजार कर कल तक।

मगही भाषा हे या बोली?

मगही भाषा हे या बोली? एकरा बहस कइल जा सक हे। लेकिन अगर मैथिली और भोजपुरी भाषा के सम्मान पा सक हे तो फिर मगही से भेदभाव काहे? पटना, गया, जहानाबाद, मसौढ़ी, फतुहा, नालंदा, नवादा, मुंगेर, बेगुसराय, हजारीबाग, गिरीडीह, औरंगाबाद, डालटेनगंज, गढ़वा, बोकारो, सिंहभूमि, झरिया आदि कम से कम १७ जिला में मगही भाषा के प्रसार हे। ई संख्या अधिक भी हो सक हे। ओइसे एतना भी कम न हे। लेकिन मगही केकवि साहित्कार सबकेअभियान राजनीतिक समर्थन न मिले के कारण परिणाम देवेवाला आंदोलन न बन सकल। यूनिवर्सिटी में कोर्स लगला के बाद भी पढाई के व्यवस्था न हे। मगही अकादमी मरनासन्न हे। साहित्त अकादमी में मैथिली के पुरस्कार हे पर मगही पर कोई धेयान न देल गेल। तुलनात्मक तौर पर मगही के इतिहास मैथिली और भोजपुरी दोनों से पुराना हे। जैन धरम के तीर्थंकर महावीर भी अपन उपदेश अर्ध मागधी में देलन हल। गौतम के उपदेश भी मगध के जनभाषा मागधी में हल जेकरा बाद में पाली में लिपिबद्ध कइल गेल। एकर वर्तमान स्वरूप केझलक सिद्ध सरहपाद के रचना से देखल जा सक हे। अब जबकि बिहार के मुखमंत्री भी मगही भाषी हथन तब भी ओही स्थिति हे।